Harish Rao: ఏ ముఖం పెట్టుకుని సిద్ధిపేటకు వస్తున్నారు- సీఎం రేవంత్‌ను ప్రశ్నించిన హరీశ్ రావు

Harish Rao: ప్రజలకు ఇచ్చిన మాట నిలబెట్టుకోలేని ముఖ్యమంత్రి రేవంత్ రెడ్డి.. ఏ ముఖం పెట్టుకుని సిద్ధిపేటకు వస్తున్నారని మాజీమంత్రి హరీశ్ రావు ప్రశ్నించారు. మాజీ సీఎం కేసీఆర్ నిర్మించిన ఆయిల్ పామ్ ఫ్యాక్టరీకి రిబ్బన్ కట్ చేసేందుకు రేవంత్ రెడ్డి మార్చి 22, 2026 నాడు సిద్ధిపేటకు వచ్చారని.. ఆరోజు మీటింగ్ లో 45 రోజుల్లో 9 వేల కోట్ల రైతు భరోసా నిధులు వేస్తామని రాష్ట్ర రైతాంగానికి హామీ ఇచ్చారని గుర్తు చేశారు. 230 రోజులు అవుతున్నా.. ఈ రోజుకు కూడా డబ్బులు ఇవ్వలేదని మండిపడ్డారు.

సీఎం రేవంత్ రెడ్డి దేవుళ్ల మీద ఒట్లు వేసి మాట తప్పినందుకు ఈరోజు రాష్ట్రానికి అరిష్టం కలిగిందన్నారు హరీశ్ రావు. రేవంత్ పాపం వల్లనే రాష్ట్రానికి కరువు వచ్చిందని ధ్వజమెత్తారు. మే 2, 2024 నాడు మొదటిసారి రేవంత్ రెడ్డి సిద్ధిపేటకు వచ్చినప్పుడు కొమురవెల్లి మల్లన్న సాక్షిగా పంద్రాగస్టు లోపల 2లక్షల రుణమాఫీ చేస్తా అన్నారని.. ఇప్పటికీ మూడు పంద్రాగస్టులు పోయాయి.. కానీ రైతు రుణమాఫీ కాని పరిస్థితి ఉందని వాపోయారు. సిద్ధిపేటలో మీడియాతో మాట్లాడారు హరీశ్ రావు.