నల్ల సముద్రంలో ప్రయాణిస్తున్న ఒక వాణిజ్య నౌకపై రష్యా చేపట్టిన డ్రోన్ దాడి తీవ్ర కలకలం రేపింది. రొమేనియా తీర ప్రాంత సమీపంలో 'ఎంవి రోయాద్ మమ్మడోవ్' (MV Royad Mammadov) అనే కార్గో నౌకపై మంగళవారం తెల్లవారుజామున ఈ దాడి జరిగింది. ఈ ప్రమాదంలో నౌకలోని ఇద్దరు సిబ్బంది అక్కడికక్కడే ప్రాణాలు కోల్పోగా, ఒక భారత నావికుడితో పాటు మరికొందరు తీవ్రంగా గాయపడ్డారు. గాయపడిన నౌక సిబ్బందిని అత్యవసర చికిత్స నిమిత్తం రొమేనియాలోని ఆసుపత్రికి తరలించారు.
ఆ సమయంలో నౌకలో ముగ్గురు భారతీయ పౌరులు విధులు నిర్వర్తిస్తుండగా, వారిలో ఒకరికి గాయాలైనట్లు సమాచారం అందింది. రొమేనియాలోని భారత రాయబారి మనోజ్ మహాపాత్ర నౌకలోని భారతీయ నావికులతో మాట్లాడి, వారికి అందుతున్న వైద్య సహాయం, ఇతర భద్రతా ఏర్పాట్లను సమీక్షించారు. వాణిజ్య నౌకపై జరిగిన ఈ డ్రోన్ దాడిని విదేశాంగ మంత్రిత్వ శాఖ తీవ్రంగా ఖండించింది. ఇలాంటి దాడులు ఎంతమాత్రం ఆమోదయోగ్యం కావని భారత ప్రభుత్వం స్పష్టం చేసింది.
ఈ ఘటనపై విదేశాంగ మంత్రి డాక్టర్ ఎస్.జైశంకర్ స్పందిస్తూ.. ఉక్రెయిన్-రష్యా వివాదాన్ని కేవలం చర్చలు, దౌత్య మార్గాల ద్వారానే పరిష్కరించుకోవాలని పునరుద్ఘాటించారు. మాస్కో, కీవ్లతో భారత్ నిరంతరం సంప్రదింపులు జరుపుతోందని వెల్లడించారు. రష్యా-ఉక్రెయిన్ మధ్య కొనసాగుతున్న యుద్ధం కారణంగా నల్ల సముద్రంలో ఓడరేవులు, వాణిజ్య నౌకలపై దాడులు పెరిగిపోతున్నాయి. అంతర్జాతీయ నౌకాయానానికి, ప్రపంచ వాణిజ్యానికి అత్యంత కీలకమైన ఈ మార్గంలో భద్రత క్షీణించడంపై పలు దేశాలు తీవ్ర ఆందోళన వ్యక్తం చేస్తున్నాయి.
యుద్ధ తీవ్రత వల్ల నల్ల సముద్రంలో నౌకాయానం అత్యంత ప్రమాదకరంగా మారడమే కాకుండా, ధాన్యంతో పాటు ఇతర నిత్యావసర సరుకుల రవాణాపై తీవ్ర ప్రభావం పడుతోంది. అంతర్జాతీయ జలాల్లో ప్రయాణించే పౌర వాణిజ్య నౌకల రక్షణ, నావికుల భద్రతను నిర్ధారించేందుకు తక్షణమే అంతర్జాతీయ స్థాయిలో బలమైన భద్రతా చర్యలు చేపట్టాలని ఆర్థిక, రవాణా రంగ నిపుణులు హెచ్చరిస్తున్నారు.


