తెలంగాణ

కాంగ్రెస్ పనైపోయింది.. మళ్లీ వచ్చేది బీఆర్ఎస్ ప్రభుత్వమే

Harish Rao: తెలంగాణలో కాంగ్రెస్ పని అయిపోందన్నారు మాజీమంత్రి హరీశ్ రావు. రాష్ట్రంలో మళ్లీ వచ్చేది బీఆర్ఎస్ ప్రభుత్వమే అని ఆయన ధీమా వ్యక్తం చేశారు. ఖైరతాబాద్ నియోజకవర్గానికి చెందిన పలువురు కాంగ్రెస్ నాయకులు బీఆర్ఎస్ లో చేరారు. మాజీమంత్రి హరీశ్ రావు వారికి గులాబీ కండువా కప్పి పార్టీలోకి ఆహ్వానించారు. ఈ సందర్భంగా మాట్లాడిన హరీశ్ రావు.. కాంగ్రెస్ ప్రభుత్వంపై నిప్పులు చెరిగారు.

రేవంత్ రెడ్డిని కాంగ్రెస్ ఎమ్మెల్యేలే పొట్టు పొట్టు తిడుతున్నారు

కాంగ్రెస్ పని అయిపోయింది, బీఆర్ఎస్ అధికారంలోకి వస్తుందని చెప్పడానికి తెలంగాణ భవన్ లో ప్రతిరోజు జరుగుతున్న చేరికలే నిదర్శనం అన్నారు హరీశ్ రావు. పార్టీ మారిన దానం నాగేందర్ ను హైకోర్టు డిస్ క్వాలిఫై చేసిందని, రేపో మాపో ఎన్నికలు రాబోతున్నాయన్నారు. అన్ని సర్వేల్లో తేలుతుంది రాష్ట్రంలో వచ్చేది బీఆర్ఎస్ ప్రభుత్వమే, కేసీఆర్ ప్రభుత్వమే అని వ్యాఖ్యానించారు. ఏ పార్టీలు, ఏ ఏజెన్సీ సర్వే చేసినా ఇదే రిపోర్టు వస్తుందన్నారు. రేవంత్ రెడ్డిని మనం కాదు, కాంగ్రెస్ ఎమ్మెల్యేలే పొట్టు పొట్టు తిడుతున్నారని హరీశ్ రావు చెప్పారు.