మార్కెట్లో నిత్యావసరాల ధరల పెరుగుదల సామాన్య కుటుంబాలపై అదనపు భారాన్ని మోపుతోంది. తాజాగా అందుబాటులో ఉన్న ధరల పట్టికను పరిశీలిస్తే.. సెప్టెంబర్తో పోలిస్తే అక్టోబర్లో పప్పులు, మిరపకాయలు, చక్కెర, డ్రైఫ్రూట్స్ తదితర వస్తువుల ధరలు గణనీయంగా పెరిగాయి. ప్రభుత్వం మారిన తర్వాత ధరల నియంత్రణపై చర్యలు అవసరమన్న చర్చ కొనసాగుతున్న వేళ.. నెల వ్యవధిలోనే పలు కీలక వస్తువుల ధరలు పైకి కదలడం ఆందోళన కలిగిస్తోంది.
సెప్టెంబర్లో కిలో కందిపప్పు ధర రూ.126 ఉండగా.. అక్టోబర్లో రూ.143కు చేరింది. అంటే కిలోకు రూ.17, సుమారు 13.5శాతం పెరుగుదల నమోదైంది. అదేవిధంగా మినపప్పు రూ.120నుంచి రూ.128కు, పెసరపప్పు రూ.106నుంచి రూ.112కు, శనగపప్పు రూ.80నుంచి రూ.90కు పెరిగాయి. అంటే ఈ నాలుగు ప్రధాన పప్పుల ధరలు నెల వ్యవధిలోనే రూ.6నుంచి రూ.17వరకు పెరిగినట్లు పట్టికలో కనిపిస్తోంది. దేశవ్యాప్తంగా కూడా అక్టోబర్లో కందిపప్పు, మినపప్పు, పెసరపప్పు వంటి పప్పుల ధరలు కీలక వినియోగ వస్తువుల ధరల జాబితాలో కొనసాగుతున్నాయి.
ఘాటెక్కిన మిరప
మిరపకాయల ధరల్లో మరింత గట్టిగా పెరుగుదల కనిపించింది. గుండు మిర్చి కిలో రూ.330 నుంచి రూ.420కు, అంటే రూ.90 పెరగగా.. పొడవు మిర్చి రూ.275 నుంచి రూ.290కు చేరింది. ధనియాలు రూ.190 నుంచి రూ.210కు, బాస్మతి బియ్యం రూ.113 నుంచి రూ.122కు పెరిగాయి. చక్కెర కూడా కిలో రూ.43 నుంచి రూ.50కు చేరింది. దీంతో రోజువారీ వంటల్లో తప్పనిసరిగా ఉపయోగించే పప్పులు, మసాలా దినుసులు, చక్కెర వంటి వస్తువుల ధరలు ఒకేసారి పైకి వెళ్లడం గమనార్హం.
రూ.150పెరిగిన డ్రైఫ్రూట్స్
డ్రైఫ్రూట్స్ ధరల పెరుగుదల కూడా వినియోగదారులకు షాక్ ఇస్తోంది. బాదం కిలో రూ.1,000 నుంచి రూ.1,150కు చేరి రూ.150 పెరిగింది. స్ప్లిట్ జీడిపప్పు రూ.760 నుంచి రూ.830కు, మొత్తం జీడిపప్పు రూ.760 నుంచి రూ.850కు పెరిగాయి. ఎండు ద్రాక్ష ధర అయితే రూ.320 నుంచి ఏకంగా రూ.420కు చేరింది. అంటే కిలోకు రూ.100 పెరుగుదల. ఈ పట్టికలో ఉన్న మొత్తం 13 వస్తువుల్లోనూ సెప్టెంబర్తో పోలిస్తే అక్టోబర్లో ధర పెరిగింది. కాబట్టి ఇవి కేవలం ఒక్కో వస్తువు ధరల మార్పులుగానే కాకుండా.. కుటుంబాల నెలవారీ కిరాణా బడ్జెట్పై పడుతున్న అదనపు భారంగా చూడాల్సిన పరిస్థితి కనిపిస్తోంది.
ప్రభుత్వ పర్యవేక్షణేది?
ధరల పెరుగుదలపై తెలంగాణ ప్రభుత్వం ప్రత్యేకంగా దృష్టి సారించాల్సిన అవసరం ఉంది. ఇప్పటికైనా మార్కెట్లో ధరల పెరుగుదలకు గల కారణాలను గుర్తించడంతో పాటు, అక్రమ నిల్వలు, కృత్రిమ కొరత, అధిక ధరలకు విక్రయాలు వంటి అంశాలపై పర్యవేక్షణ పెంచాల్సిన అవసరం ఉందని నిపుణులు సూచిస్తున్నారు. ముఖ్యంగా రోజువారీ వినియోగ వస్తువుల ధరలపై నిరంతర నిఘా పెట్టి, సాధ్యమైన చోట సరఫరా వ్యవస్థను బలోపేతం చేయాలని, ధరల నియంత్రణకు తగిన చర్యలు తీసుకుంటేనే పెరుగుతున్న జీవన వ్యయంతో ఇబ్బంది పడుతున్న మధ్యతరగతి, సామాన్య కుటుంబాలకు కొంత ఉపశమనం లభించే అవకాశం ఉంటుందని సూచిస్తున్నారు.


