ప్రపంచవ్యాప్తంగా ఇటీవల మైక్రోసాఫ్ట్ క్లౌడ్ సేవల్లో తలెత్తిన భారీ అంతరాయంపై ఆ సంస్థ సీఈవో సత్య నాదెళ్ల స్పందించారు. అంతర్జాతీయ స్థాయిలో కోట్లాది మంది వినియోగదారులను ఇబ్బందులకు గురిచేసిన ఈ సాంకేతిక సంక్షోభంపై విచారం వ్యక్తంచేశారు. దీన్ని ముందే నివారించడంలో తాము మరింత సమర్థవంతంగా వ్యవహరించి ఉండాల్సిందని ఆయన నిజాయతీగా అంగీకరించారు. ప్రముఖ అంతర్జాతీయ మీడియా సంస్థ సీఎన్బీసీ (CNBC)కి ఇచ్చిన ప్రత్యేక ఇంటర్వ్యూలో సత్య నాదెళ్ల మాట్లాడుతూ.. సాఫ్ట్వేర్ వ్యవస్థలో నిద్రాణంగా దాగి ఉన్న ఒక చిన్న బగ్ ఒక్కసారిగా భారీ యూజర్ ట్రాఫిక్ను ఎదుర్కోవడంతోనే ఈ వ్యవస్థ కుప్పకూలిందని స్పష్టం చేశారు.
టెస్టింగ్ దశలోనే ఇలాంటి సాఫ్ట్వేర్ లోపాలను గుర్తించడంలో తమ బృందాలు విఫలమయ్యాయని నాదెళ్ల అంగీకరించారు. ఒక చిన్నపాటి సాంకేతిక లోపం ప్రపంచవ్యాప్త నెట్వర్క్కు వ్యాపించకుండా కట్టుదిట్టమైన రక్షణ చర్యలు తీసుకుని ఉండాల్సిందని పేర్కొన్నారు. గత వారం తొలుత ఔట్లుక్ (Outlook) సేవల్లో మొదలైన ఈ అంతరాయం, ఆ తర్వాత వేగంగా టీమ్స్ (Teams), కోపైలట్ (Copilot), మైక్రోసాఫ్ట్ 365, షేర్పాయింట్, వన్డ్రైవ్ వంటి కీలక సేవలన్నింటినీ స్తంభింపజేసింది. ఫలితంగా దాదాపు ఒక రోజుకు పైగా ఐటీ కంపెనీలు, కార్పొరేట్ కార్యాలయాల కార్యకలాపాలకు తీవ్ర ఆటంకం ఏర్పడింది.
ప్రాథమిక సాంకేతిక దర్యాప్తు నివేదికల ప్రకారం.. ఈ ఏడాది ఆరంభంలోనే సిస్టమ్లోకి ప్రవేశించిన ఈ నిద్రాణ బగ్తో పాటు విపరీతమైన ట్రాఫిక్ ఒత్తిడి, సర్వర్ సామర్థ్యం తగ్గడం వల్లే ఈ సమస్య తలెత్తినట్లు తేలింది. అయితే ఈ ఘటన వెనుక ఎలాంటి సైబర్ దాడి లేదా హ్యాకింగ్ ఆనవాళ్లు లేవని మైక్రోసాఫ్ట్ స్పష్టం చేసింది. కృత్రిమ మేధ (AI) సహాయంతో సాఫ్ట్వేర్ అభివృద్ధి, లోపాల గుర్తింపు ప్రక్రియ వేగవంతమైనప్పటికీ, ఆ అప్డేట్ ప్యాచ్లను అంతే వేగంగా పాత సాంకేతిక వ్యవస్థల్లోకి అనుసంధానించడం ఆపరేషనల్ రిస్క్లకు దారితీస్తోందని నాదెళ్ల విశ్లేషించారు.
నూతన సాఫ్ట్వేర్ మార్పులను పాత మౌలిక సదుపాయాలు తట్టుకోలేకపోవడం వల్లే ఇలాంటి అనుకోని విపత్తులు ఎదురవుతున్నాయని, ఇది నేడు యావత్ టెక్ పరిశ్రమ ఎదుర్కొంటున్న విస్తృత సవాలు అని ఆయన అభిప్రాయపడ్డారు. ఇటీవల నిర్వహించిన 'ఇగ్నైట్' (Ignite) సదస్సులో కోపైలట్ను ఆధునిక పని ప్రదేశాల్లో ప్రధాన వేదికగా నిలపనున్నట్లు ప్రకటించిన మైక్రోసాఫ్ట్కు ఈ భారీ అంతరాయం ఒక పెద్ద గుణపాఠంగా మారింది. భవిష్యత్తులో ఇలాంటి సంఘటనలు పునరావృతం కాకుండా వ్యవస్థలను మరింత బలోపేతం చేస్తామని సత్య నాదెళ్ల హామీ ఇచ్చారు.
